ഒരു സംഗീത പരിപാടിക്ക് ശേഷം ആരാധകരെ കാണുന്നതിനിടെ ഉണ്ടായ അസ്വസ്ഥമായ അനുഭവത്തെ കുറിച്ച് തുറന്നുപറഞ്ഞിരിക്കുകയാണ് അനുഷ്ക ശങ്കർ. സോഷ്യൽ മീഡിയയിൽ പങ്കുവെച്ച കുറിപ്പിലാണ് ഒരു ആരാധകൻ അനുവാദത്തിനായി കാത്തുനിൽക്കാതെ തന്നെ എടുത്തുയർത്തിയതായും ആ സംഭവം പഴയ മാനസിക മുറിവുകളും ട്രോമകളും വീണ്ടും ഓർമ്മിപ്പിച്ചുവെന്നും അനുഷ്ക വെളിപ്പെടുത്തിയത്.
“കഴിഞ്ഞ വാരാന്ത്യത്തിൽ ഒരു പുരുഷൻ എന്നെ എടുത്തുയർത്തി. ശരിക്കും വായുവിലേക്ക് ഉയർത്തുകയായിരുന്നു. അങ്ങനെ ചെയ്യാമോ എന്ന് ചോദിച്ചെങ്കിലും, ഞാൻ മറുപടി പറയുന്നതിന് മുമ്പേ ഒരു അപരിചിതന്റെ കരവലയത്തിൽ കാലുകൾ തൂങ്ങിക്കിടക്കുന്ന അവസ്ഥയിലായിരുന്നു ഞാൻ,” എന്നാണ് അനുഷ്ക കുറിച്ചത്.
ഒരു ഷോയ്ക്ക് ശേഷം ചില ആരാധകരെ കാണുന്നതിനിടെയായിരുന്നു സംഭവം. എല്ലാം വളരെ വേഗത്തിൽ നടന്നുവെന്നും ആദ്യം താൻ എങ്ങനെ പ്രതികരിക്കണമെന്നറിയാതെ പോയെന്നും അവർ പറയുന്നു. “ഞാൻ അസ്വാഭാവികമായി ചിരിച്ചു, എന്നെ താഴെയിറക്കാൻ ആവശ്യപ്പെട്ടു. പിന്നീട് അദ്ദേഹത്തിന്റെ പോസ്റ്ററിൽ ഒപ്പിട്ടു, ചിരിച്ചു കൈവീശുകയും ചെയ്തു,” എന്നാണ് അനുഷ്ക പങ്കുവെച്ചത്.
ആദ്യ ഘട്ടത്തിൽ ആ വ്യക്തിക്ക് ദുരുദ്ദേശമില്ലായിരുന്നുവെന്നാണ് താൻ കരുതിയതെന്നും അവർ വ്യക്തമാക്കുന്നു. “അമിത ആവേശത്തിൽ ചിന്തിക്കാതെ ചെയ്തതാകാം എന്നാണ് ഞാൻ കരുതിയത്. ഇപ്പോഴും അതാണ് സത്യമെന്ന് ഞാൻ വിശ്വസിക്കുന്നു. പക്ഷേ പിന്നീട് ആളുകളുടെ പ്രതികരണങ്ങൾ കണ്ടപ്പോഴാണ് ഞാൻ അനുഭവിച്ചതിനെക്കാൾ കൂടുതൽ അസ്വസ്ഥത മറ്റുള്ളവർക്ക് തോന്നിയെന്ന് മനസ്സിലായത്,” എന്ന് അവർ പറഞ്ഞു.
സംഭവം കഴിഞ്ഞ് ദിവസങ്ങൾക്കിപ്പുറമാണ് അതിന്റെ യഥാർത്ഥ മാനസിക സ്വാധീനം തിരിച്ചറിഞ്ഞതെന്ന് അനുഷ്ക തുറന്ന് സമ്മതിച്ചു. ബാല്യകാലത്ത് അനുഭവിച്ച മാനസിക പീഡനങ്ങളുടെയും അതിക്രമങ്ങളുടെയും ഓർമ്മകൾ വീണ്ടും മനസ്സിലേക്ക് വന്നുവെന്നും അവർ പറയുന്നു.
“ഒരാൾ എന്റെ അതിരുകൾ ലംഘിച്ചപ്പോൾ എങ്ങനെ പ്രതികരിക്കണമെന്ന് എനിക്ക് ഉടനെ മനസ്സിലായില്ല. എന്റെ അസ്വസ്ഥതയെക്കാൾ അദ്ദേഹത്തിന്റെ ഉദ്ദേശശുദ്ധിക്കാണ് ഞാൻ പ്രാധാന്യം നൽകിയത്,” എന്നാണ് അവർ കുറിച്ചത്.
ഇത്തരം അനുഭവങ്ങൾ നേരിടുന്ന പലർക്കും ലജ്ജയും നിരാശയും ആശയക്കുഴപ്പവും ഉണ്ടാകാമെന്നും, രോഗശാന്തിയുടെ യാത്ര ഒരിക്കലും നേരായ വഴിയല്ലെന്നും അനുഷ്ക പറയുന്നു.
“നിങ്ങൾക്കും ഇത്തരം അനുഭവങ്ങൾ ഉള്ളിൽ സൂക്ഷിക്കുന്നുണ്ടെങ്കിൽ, ദയവായി നിങ്ങളോട് മൃദുവായി പെരുമാറുക. ഒരു നിമിഷത്തേക്ക് നിങ്ങളുടെ ശബ്ദം നഷ്ടപ്പെട്ടാലും, അത് വീണ്ടും നിങ്ങളിൽ കണ്ടെത്താൻ കഴിയുമെന്ന് ഓർക്കുക,” എന്നായിരുന്നു അവരുടെ സന്ദേശം.
പ്രശസ്ത സംഗീതജ്ഞനായ രവി ശങ്കറിന്റെ മകളായ അനുഷ്ക ശങ്കർ ലോക സംഗീത വേദികളിൽ ഇന്ത്യൻ ശാസ്ത്രീയ സംഗീതത്തെ ആഗോള തലത്തിൽ അവതരിപ്പിച്ച പ്രമുഖ കലാകാരികളിൽ ഒരാളാണ്. ഗ്രാമി നോമിനേഷൻ നേടിയ കലാകാരിയെന്ന നിലയിലും അവർ ശ്രദ്ധിക്കപ്പെടുന്നു.
