മലയാള സിനിമയില് നടന്, സംവിധായകന്, നിര്മാതാവ് എന്നിങ്ങനെ നിരവധി മേഖലകളില് തന്റെ സാന്നിധ്യം ഉറപ്പിച്ച താരമാണ് പൃഥ്വിരാജ്. എന്നാല് അഭിനയത്തിന് പുറമെ ഗായകനായും അദ്ദേഹം മലയാളി പ്രേക്ഷകരുടെ കൈയടി നേടിയിട്ടുണ്ട്. ‘പുതിയ മുഖം’ മുതല് ‘ഹൃദയം’ വരെ നിരവധി ചിത്രങ്ങളില് പൃഥ്വിരാജിന്റെ ശബ്ദം ശ്രദ്ധിക്കപ്പെട്ടിട്ടുണ്ട്. എന്നിരുന്നാലും താന് ഒരു പ്രൊഫഷണല് ഗായകനല്ലെന്നും പാട്ട് റെക്കോര്ഡ് ചെയ്യുന്നത് അത്ര ഇഷ്ടപ്പെടുന്ന ആളല്ലെന്നും തുറന്നു പറയുകയാണ് താരം.
പുതിയ ചിത്രം ഐ, നോബഡിയുടെ പ്രചാരണ പരിപാടിക്കിടെയായിരുന്നു പൃഥ്വിരാജിന്റെ രസകരമായ വെളിപ്പെടുത്തല്. സംഗീത സംവിധായകര് പാടാന് വിളിക്കുമ്പോള് സാധാരണയായി താന് അവരെ നിരുത്സാഹപ്പെടുത്താന് ശ്രമിക്കാറുണ്ടെന്നാണ് താരം പറയുന്നത്. തന്റെ ശബ്ദത്തേക്കാള് മികച്ച ഗായകരെ നിര്ദേശിച്ചും പാട്ട് മറ്റാരെയെങ്കിലും കൊണ്ട് പാടിക്കണമെന്നുമൊക്കെ പറഞ്ഞ് രക്ഷപ്പെടാന് ശ്രമിക്കാറുണ്ടെന്നും അദ്ദേഹം ചിരിയോടെ പറഞ്ഞു.
‘പുതിയ മുഖം’ സിനിമയിലെ ടൈറ്റില് ഗാനത്തിലൂടെയാണ് പൃഥ്വിരാജ് പിന്നണി ഗാനരംഗത്തേക്ക് കടന്നുവന്നത്. തുടര്ന്ന് ‘അന്വര്’ സിനിമയിലെ നിന്നെ കണ്ട കടലല പോലെ എന്ന ഗാനവും ശ്രദ്ധിക്കപ്പെട്ടു. പിന്നീട് ഹൃദയം സിനിമയിലെ താതക തെയ്താരെ എന്ന ഗാനവും വലിയ ജനപ്രീതി നേടി. എന്നാല് ഈ വിജയങ്ങള്ക്കിടയിലും ഗായകനെന്ന നിലയില് തനിക്ക് വലിയ ആത്മവിശ്വാസമില്ലായിരുന്നുവെന്നാണ് താരം പറയുന്നത്.
അത്തരത്തില് പാട്ടിനായി തന്നെ ഏറ്റവും കൂടുതല് കണ്വിന്സ് ചെയ്ത വ്യക്തിയെക്കുറിച്ചും പൃഥ്വിരാജ് മനസുതുറന്നു. അത് മറ്റാരുമല്ല, സംവിധായകനും ഗായകനുമായ വിനീത് ശ്രീനിവാസനാണ്. താന് കണ്ടതില് വെച്ച് ഏറ്റവും വലിയ “കണ്വിന്സിങ് സ്റ്റാര്” വിനീത് ആണെന്ന് പൃഥ്വിരാജ് തമാശയോടെ പറഞ്ഞു.
“രാജു, ഈ നോട്ട് പാടുമ്പോള് രാജുവിന്റെ ശബ്ദത്തില് ഒരു പ്രത്യേക ഫീല് വരും. അത് എനിക്ക് വേണം,” എന്ന് പറഞ്ഞ് വിനീത് തന്നെ വീഴ്ത്തിക്കളയുമെന്നാണ് പൃഥ്വിരാജിന്റെ വാക്കുകള്. ഒരു ഗാനത്തിന് തന്റെ ശബ്ദം എന്തുകൊണ്ട് ആവശ്യമാണ് എന്നത് വളരെ വിശദമായി പറഞ്ഞ് ബോധ്യപ്പെടുത്താന് വിനീതിന് കഴിയുമെന്നാണ് താരം പറയുന്നത്.
സ്റ്റുഡിയോയില് പോയി പാട്ട് റെക്കോര്ഡ് ചെയ്യുന്നത് താന് പ്രത്യേകിച്ച് ആസ്വദിക്കുന്ന കാര്യമല്ലെന്നും അതിനോട് വലിയ പാഷന് ഇല്ലെന്നും പൃഥ്വിരാജ് തുറന്നു സമ്മതിച്ചു. എന്നിട്ടും വിനീതിന്റെ വാക്കുകള്ക്കും ആത്മവിശ്വാസത്തിനും മുന്നില് പലപ്പോഴും വഴങ്ങിപ്പോകേണ്ടി വന്നിട്ടുണ്ടെന്നും അദ്ദേഹം കൂട്ടിച്ചേര്ത്തു.
സംഗീത സംവിധായകരായ ദീപക് ദേവ്, ഗോപി സുന്ദര്, ജെയ്ക്സ് ബിജോയ് എന്നിവരടക്കം പലരും തന്നെ പാടാന് വിളിച്ചിട്ടുണ്ടെങ്കിലും, അത്രയും ക്ഷമയോടെ കണ്വിന്സ് ചെയ്ത് പാട്ട് പാടിപ്പിച്ച വ്യക്തി വിനീത് ശ്രീനിവാസനാണെന്നാണ് പൃഥ്വിരാജിന്റെ വിലയിരുത്തല്. അതുകൊണ്ടുതന്നെ ഭാവിയില് വീണ്ടും പാടേണ്ട സാഹചര്യം വന്നാല്, അതിന് പിന്നിലും വിനീതിനെപ്പോലെ ഒരാള് ഉണ്ടാകേണ്ടിവരുമെന്ന് താരം തമാശയോടെ പറഞ്ഞു.
പൃഥ്വിരാജിന്റെ ഈ തുറന്നുപറച്ചില് സോഷ്യല് മീഡിയയില് ഇതിനോടകം ചര്ച്ചയായിക്കഴിഞ്ഞു. വിനീത് ശ്രീനിവാസന്റെ സൗഹൃദപരമായ സമീപനത്തെയും കലാകാരന്മാരെ പ്രചോദിപ്പിക്കുന്ന കഴിവിനെയും കുറിച്ച് ആരാധകര് പ്രശംസയുമായി രംഗത്തെത്തിയിരിക്കുകയാണ്.
