ജയ്പൂർ: ഇന്ത്യൻ പ്രീമിയർ ലീഗിന്റെ ചരിത്രത്തിൽ ഇതുവരെ ആരും കരുതാത്ത രീതിയിലാണ് 15കാരൻ വൈഭവ് സൂര്യവംശി തന്റെ പേര് എഴുതി ചേർത്തത്. ക്രിക്കറ്റ് ലോകം “യൂണിവേഴ്സ് ബോസ്” എന്ന് വിളിച്ചിരുന്ന ക്രിസ് ഗെലിന്റെ റെക്കോഡ് മറികടന്ന് ഇപ്പോൾ ആരാധകർ വൈഭവിനെ “യൂണിവേഴ്സ് ബേബി ബോസ്” എന്നാണ് വിളിക്കുന്നത്.
ഐപിഎൽ എലിമിനേറ്ററിൽ രാജസ്ഥാന് റോയല്സ് സണ്റൈസേഴ്സ് ഹൈദരാബാദിനെതിരെ കളിച്ച മിന്നും ഇന്നിങ്സോടെയാണ് വൈഭവ് ചരിത്ര നേട്ടം സ്വന്തമാക്കിയത്. വെറും 29 പന്തിൽ 97 റൺസ് നേടിയ താരം അഞ്ച് ഫോറുകളും 12 കൂറ്റൻ സിക്സുകളും പറത്തി സ്റ്റേഡിയം മുഴുവൻ ആവേശത്തിലാഴ്ത്തി.
ഒരു നിമിഷം ആരാധകർക്ക് തോന്നിയത് മറ്റൊരു ചരിത്രം കൂടി ജനിക്കാനിരിക്കുകയാണെന്നായിരുന്നു. 2013ൽ ക്രിസ് ഗെയ്ല് നേടിയ 30 പന്തിലെ അതിവേഗ ഐപിഎൽ സെഞ്ച്വറിയും വൈഭവ് മറികടക്കുമെന്ന് എല്ലാവരും പ്രതീക്ഷിച്ചു. എന്നാൽ 29ാം പന്തിൽ 97 റൺസിൽ പുറത്തായതോടെ സെഞ്ച്വറി മൂന്ന് റൺസ് അകലെ നഷ്ടമായി.
പുറത്തായ ശേഷം നിരാശയോടെ മടങ്ങുന്ന വൈഭവിന്റെ മുഖം തന്നെ ആ ഇന്നിങ്സിന്റെ തീവ്രത വ്യക്തമാക്കിയിരുന്നു. എങ്കിലും അതിനകം തന്നെ ഐപിഎൽ ചരിത്രത്തിലെ ഏറ്റവും വലിയൊരു റെക്കോഡ് 15കാരൻ സ്വന്തമാക്കിയിരുന്നു.
ഈ സീസണിൽ ഇതിനകം 53 സിക്സുകൾ നേടിയിരുന്ന വൈഭവ്, ഹൈദരാബാദിനെതിരെ 12 സിക്സുകൾ കൂടി പറത്തിയതോടെ ആകെ സിക്സുകളുടെ എണ്ണം 65 ആയി. ഇതോടെ ഒരു ഐപിഎൽ സീസണിൽ ഏറ്റവും കൂടുതൽ സിക്സുകൾ നേടുന്ന താരമെന്ന റെക്കോഡ് ഇനി വൈഭവിന്റെ പേരിലായി.
We have no words for you, Vaibhav Sooryavanshi 🔥
— Rajasthan Royals (@rajasthanroyals) May 27, 2026
Baby Boss, FOR REAL! 💗😭 pic.twitter.com/RX6hBRU4bv
മുൻ റെക്കോഡ് ക്രിസ് ഗെയ്ലിന്റെ പേരിലായിരുന്നു. 2012 സീസണിൽ റോയല് ചലഞ്ചേഴ്സ് ബെംഗളൂരുനായി കളിക്കുമ്പോൾ ഗെയ്ല് 59 സിക്സുകളാണ് അടിച്ചെടുത്തത്. വർഷങ്ങളോളം ആരും തകർക്കാനാകാതെ നിന്ന ആ നേട്ടമാണ് ഇപ്പോൾ 15കാരൻ മറികടന്നത്.
ഐപിഎൽ ചരിത്രത്തിൽ ഒരു സീസണിൽ ഏറ്റവും കൂടുതൽ സിക്സുകൾ നേടിയ താരങ്ങളുടെ പട്ടികയിൽ ഇനി വൈഭവ് ഒന്നാമതാണ്:
വൈഭവ് സൂര്യവംശി – 65 സിക്സുകൾ (2026)
ക്രിസ് ഗെയ്ല് – 59 സിക്സുകൾ (2012)
ആന്ദ്രേ റസല് – 52 സിക്സുകൾ (2019)
ക്രിസ് ഗെയ്ല് – 51 സിക്സുകൾ (2013)
ജോസ് ബട്ലര് – 45 സിക്സുകൾ (2022)
വൈഭവിന്റെ ഇന്നിങ്സിന് പുറമെ ധ്രുവ് ജുറെല് അർധസെഞ്ച്വറിയും രാജസ്ഥാന്റെ വിജയത്തിൽ നിർണായകമായി. വെറും 21 പന്തിൽ 50 റൺസ് നേടിയ താരം അഞ്ച് ഫോറുകളും മൂന്ന് സിക്സുകളും സ്വന്തമാക്കി.
ഈ സീസണിൽ തന്നെ ഒരു ഐപിഎൽ സീസണിൽ 50-ൽ കൂടുതൽ സിക്സുകൾ നേടുന്ന ആദ്യ ഇന്ത്യൻ താരമെന്ന നേട്ടവും വൈഭവ് സ്വന്തമാക്കിയിരുന്നു. ഇപ്പോൾ ഗെയ്ലിന്റെ റെക്കോഡും മറികടന്നതോടെ ഇന്ത്യൻ ക്രിക്കറ്റിന്റെ അടുത്ത സൂപ്പർതാരമെന്ന വിശേഷണം കൂടുതൽ ശക്തമായി മാറുകയാണ്.
16 പോയിന്റുമായി പ്ലേ ഓഫ് ടിക്കറ്റ് നേടിയ രാജസ്ഥാൻ റോയൽസിന് ഈ വിജയം ആത്മവിശ്വാസം നൽകുമ്പോൾ, പ്ലേ ഓഫ് പ്രതീക്ഷയിലായിരുന്ന പഞ്ചാബ് കിങ്സും കൊല്ക്കത്ത നൈറ്റ് റൈഡേഴ്സും പുറത്താവുകയും ചെയ്തു.
