മോഹൻലാലിനെ നായകനാക്കി ജീത്തു ജോസഫ് സംവിധാനം ചെയ്ത ദൃശ്യം 3 തിയേറ്ററുകളിൽ വമ്പൻ വിജയമായി മുന്നേറുന്നതിനിടെ, ചിത്രത്തിലെ പ്രധാന കഥാപാത്രമായ അഡ്വക്കേറ്റ് ശാന്തി മായാദേവിയെ കുറിച്ചുള്ള ഒരു അഭിമുഖഭാഗമാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത്. സിനിമയിൽ ജോർജുകുട്ടിക്ക് വേണ്ടി കോടതിയിൽ ശക്തമായി വാദിക്കുന്ന അഭിഭാഷകയായാണ് ശാന്തി പ്രേക്ഷകർക്കിടയിൽ ശ്രദ്ധ നേടിയത്. എന്നാൽ യഥാർത്ഥ ജീവിതത്തിലും അഭിഭാഷകയായ ശാന്തി മായാദേവിയുടെ ചില വെളിപ്പെടുത്തലുകൾ ഇപ്പോൾ വലിയ ചർച്ചകൾക്ക് വഴിവച്ചിരിക്കുകയാണ്.
റെഡ് എഫ്.എമ്മിന് നൽകിയ അഭിമുഖത്തിലാണ് ഭാര്യയെ അതിക്രൂരമായി കൊലപ്പെടുത്തിയ ഒരു പ്രതിയുമായുള്ള ബന്ധത്തെക്കുറിച്ച് ശാന്തി തുറന്നുപറഞ്ഞത്. ഭാര്യയെ 21 വെട്ട് വെട്ടിക്കൊന്ന കേസിലെ പ്രതിക്കായി കോടതിയിൽ ഹാജരായിരുന്നുവെന്നും ആദ്യം വധശിക്ഷ ലഭിച്ച ആ കേസിൽ പിന്നീട് അപ്പീൽ വഴി ജീവപര്യന്തമായി ശിക്ഷ കുറച്ചുവെന്നും അവർ പറഞ്ഞു.
ശാന്തിയുടെ വാക്കുകൾ പ്രകാരം, നല്ല പെരുമാറ്റത്തെ തുടർന്ന് ഇപ്പോൾ ഓപ്പൺ ജയിലിൽ കഴിയുന്ന ആ പ്രതി ഓരോ പരോളിനും പുറത്തിറങ്ങുമ്പോഴും തന്നെ കാണാൻ എത്താറുണ്ടത്രെ. ജയിലിൽ ജോലി ചെയ്ത് സമ്പാദിച്ച പണത്തിൽ നിന്ന് 10,000 രൂപ കൊണ്ടുവന്ന് “വക്കീലേ ഇത് വെച്ചോളൂ” എന്ന് പറയാറുണ്ടെന്നും ശാന്തി പറയുന്നു.
“എന്റെ ഓഫീസിലുള്ളവർക്ക് അദ്ദേഹം ഭാര്യയെ ക്രൂരമായി കൊന്ന ഒരാളാണ്. പക്ഷേ എനിക്ക് അങ്ങനെ കാണാൻ കഴിയില്ല. അതിന് പിന്നിൽ ഒരു കഥയുണ്ട്. നമ്മൾ ഒരു കുറ്റകൃത്യത്തെയും ന്യായീകരിക്കുകയല്ല ചെയ്യുന്നത്. എന്നാൽ ഒരു അഭിഭാഷക എന്ന നിലയിൽ മുൻവിധിയോടെ ഒരു കേസിനെയും സമീപിക്കാൻ കഴിയില്ല,” ശാന്തി വ്യക്തമാക്കി.
ഒരു കേസിനെ മുൻവിധിയോടെ കാണുമ്പോൾ അതിന്റെ യഥാർത്ഥ പശ്ചാത്തലം മനസിലാക്കാൻ കഴിയില്ലെന്നും അവർ കൂട്ടിച്ചേർത്തു. ഓരോ കുറ്റകൃത്യത്തിനും പിന്നിൽ ചില മാനസികവും സാമൂഹികവുമായ സാഹചര്യങ്ങൾ ഉണ്ടാകാമെന്നും, അത് മനസിലാക്കേണ്ടത് നിയമവ്യവസ്ഥയുടെ ഭാഗമാണെന്നും ശാന്തി അഭിപ്രായപ്പെട്ടു.
‘ദൃശ്യം’ സിനിമയിലെ ജോർജുകുട്ടിയെ ഉദാഹരണമായി പറഞ്ഞുകൊണ്ടായിരുന്നു ശാന്തിയുടെ വിശദീകരണം. “ജോർജുകുട്ടിക്കും തന്റെ കുടുംബത്തെ രക്ഷിക്കണമെന്നൊരു കാരണം ഉണ്ടായിരുന്നു. ഓരോ മനുഷ്യന്റെയും ജീവിതത്തിൽ ചില പ്രത്യേക സാഹചര്യങ്ങൾ ഉണ്ടാകും. അതിനെ ഒറ്റനോട്ടത്തിൽ വിലയിരുത്താനാകില്ല,” എന്നാണ് അവർ പറഞ്ഞത്.
പരോളിൽ പുറത്തിറങ്ങുമ്പോൾ ആ പ്രതിയോടൊപ്പം ചായ കുടിക്കാറുണ്ടെന്നും, സന്തോഷത്തിനായി അദ്ദേഹം നൽകുന്ന പണത്തിൽ നിന്ന് ചെറിയൊരു തുക മാത്രം വാങ്ങി ബാക്കി തിരികെ നൽകാറുണ്ടെന്നും ശാന്തി പറഞ്ഞു. “ഭാര്യയെ കൊന്നതുകൊണ്ടല്ല, ആ മനുഷ്യനോടാണ് എനിക്ക് സ്നേഹം,” എന്ന ശാന്തിയുടെ വാക്കുകളാണ് ഇപ്പോൾ സോഷ്യൽ മീഡിയയിൽ വ്യാപകമായി പ്രചരിക്കുന്നത്.
അതേസമയം, ദൃശ്യം 3 തിയേറ്ററുകളിൽ വലിയ കളക്ഷനുമായി മുന്നേറുകയാണ്. മെയ് 21-ന് മോഹൻലാലിന്റെ ജന്മദിനത്തോടനുബന്ധിച്ചാണ് ചിത്രം റിലീസ് ചെയ്തത്. ആദ്യ രണ്ട് ഭാഗങ്ങളെക്കാളും വലിയ വിജയമാണ് ചിത്രം നേടുന്നതെന്നാണ് റിപ്പോർട്ടുകൾ.
ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച ചിത്രത്തിൽ മീന, അൻസിബ, എസ്തർ, ആശാ ശരത്, സിദ്ധിഖ്, കലാഭവൻ ഷാജോൺ തുടങ്ങി വൻ താരനിര അണിനിരക്കുന്നു. ചിത്രത്തിന്റെ ഒ.ടി.ടി റിലീസ് പിന്നീട് ആമസോൺ പ്രൈം വീഡിയോയിലായിരിക്കും. ഹിന്ദി പതിപ്പ് 2026 ഒക്ടോബർ 2-ന് റിലീസ് ചെയ്യും.
