മലയാള സിനിമയുടെ അഭിമാനതാരമായ മോഹൻലാൽ ഇന്ന് തന്റെ 66-ാം പിറന്നാൾ ആഘോഷിക്കുമ്പോൾ, ആരാധകർക്ക് അത് ഇരട്ടിമധുരമായ ദിവസമായി മാറുകയായിരുന്നു. ഒരു വശത്ത് പിറന്നാൾ ആഘോഷം, മറുവശത്ത് ഏറെ പ്രതീക്ഷയോടെ കാത്തിരുന്ന ദൃശ്യം 3 റിലീസ്. എല്ലാം ഒന്നിച്ചെത്തിയപ്പോൾ കേരളമൊട്ടാകെ ആഘോഷാന്തരീക്ഷമായി.
കൊച്ചിയിലെ കവിത തിയറ്ററിലായിരുന്നു ഇത്തവണത്തെ പ്രത്യേക ആഘോഷം. ‘ദൃശ്യം 3’യുടെ ആദ്യ പ്രദർശനത്തിന് പിന്നാലെ ആരാധകർക്കൊപ്പം കേക്ക് മുറിച്ചാണ് മോഹൻലാൽ പിറന്നാൾ ആഘോഷിച്ചത്. ഭാര്യ സുചിത്ര, നടി മീന, എസ്തർ അനിൽ, നിർമാതാവ് ആന്റണി പെരുമ്പാവൂർ എന്നിവരും തിയറ്ററിലെത്തിയിരുന്നു.
“അതിമനോഹരമായ ഒരു ബർത്ത് ഡേയാണ് ഇത്. ജീവിതത്തിൽ ഒരിക്കൽ മാത്രം സംഭവിക്കുന്ന അനുഭവം,” എന്നാണ് ആരാധകരുടെ ആവേശത്തിനിടെ മോഹൻലാൽ പറഞ്ഞത്. “എല്ലാവർക്കും സിനിമ ഇഷ്ടമായെന്ന് കരുതുന്നു. ഈ സ്നേഹത്തിന് ഹൃദയത്തിന്റെ ഭാഷയിൽ നന്ദി പറയുന്നു,” എന്നും താരം കൂട്ടിച്ചേർത്തു.
‘ദൃശ്യം 3’യുടെ ആദ്യ പ്രദർശനത്തിന് പിന്നാലെ തിയറ്ററുകളിൽ നിന്ന് മികച്ച പ്രതികരണങ്ങളാണ് ലഭിക്കുന്നത്. ജോർജുകുട്ടിയുടെയും കുടുംബത്തിന്റെയും കഥ വീണ്ടും വലിയ ചർച്ചയായി മാറിയിരിക്കുകയാണ്.
1960 മെയ് 21ന് പത്തനംതിട്ടയിലെ ഇലന്തൂരിൽ ജനിച്ച മോഹൻലാൽ, നാല് പതിറ്റാണ്ടിലേറെയായി ഇന്ത്യൻ സിനിമയിലെ ഏറ്റവും ശക്തമായ സാന്നിധ്യങ്ങളിൽ ഒരാളാണ്. മഞ്ഞിൽ വിരിഞ്ഞ പൂക്കൾ എന്ന ചിത്രത്തിലൂടെ അഭിനയരംഗത്തേക്ക് എത്തിയ താരം പിന്നീട് മലയാള സിനിമയുടെ മുഖമായി മാറുകയായിരുന്നു.
‘കിരീടം’, ‘ഭരതം’, ‘സ്ഫടികം’, ‘തന്മാത്ര’, ‘ദേവാസുരം’, ‘വാനപ്രസ്ഥം’, ‘ചിത്രം’, ‘നാടോടിക്കാറ്റ്’ തുടങ്ങി തലമുറകൾ ഓർക്കുന്ന നിരവധി കഥാപാത്രങ്ങളിലൂടെ മോഹൻലാൽ തന്റെ അഭിനയ മികവ് തെളിയിച്ചു. മലയാളത്തിന് പുറമെ തമിഴ്, ഹിന്ദി, തെലുങ്ക്, കന്നഡ ഭാഷകളിലും അദ്ദേഹം ശ്രദ്ധേയ സാന്നിധ്യമായി.
പുലിമുരുഗൻ മലയാള സിനിമയുടെ ആദ്യ 100 കോടി ചിത്രം എന്ന റെക്കോഡ് സ്വന്തമാക്കിയപ്പോൾ, ലൂസിഫർ 200 കോടി ക്ലബിൽ ഇടം നേടി ചരിത്രം കുറിച്ചു. ദേശീയ പുരസ്കാരങ്ങളും സംസ്ഥാന പുരസ്കാരങ്ങളും അടക്കം നിരവധി ബഹുമതികൾ നേടിയ താരം ഇന്ന് മലയാള സിനിമയുടെ ഏറ്റവും വലിയ ബ്രാൻഡുകളിൽ ഒരാളായി തുടരുകയാണ്.
ഇതിനിടെ, ‘ദൃശ്യം 3’ റിലീസും പിറന്നാൾ ആഘോഷവും ഒന്നിച്ചെത്തിയതോടെ സോഷ്യൽ മീഡിയ മുഴുവൻ മോഹൻലാലിനുള്ള ആശംസകളാലും സിനിമാ ചർച്ചകളാലും നിറഞ്ഞിരിക്കുകയാണ്.
