തിരുവനന്തപുരം: കേരള രാഷ്ട്രീയത്തില് ഏറെ ചര്ച്ചകള്ക്ക് വഴിവെച്ച കോണ്ഗ്രസ് നേതൃമാറ്റത്തിന് പിന്നാലെ ഇപ്പോള് എല്ലാവരും ഉറ്റുനോക്കുന്നത് മറ്റൊരു ചോദ്യത്തിലേക്കാണ് — രമേശ് ചെന്നിത്തല പുതിയ മന്ത്രിസഭയുടെ ഭാഗമാകുമോ? ഡല്ഹിയില് നടന്ന നീണ്ട ചര്ച്ചകള്ക്കും ഹൈക്കമാന്ഡ് തീരുമാനങ്ങള്ക്കും പിന്നാലെ തിരുവനന്തപുരത്ത് വി ഡി സതീശനും രമേശ് ചെന്നിത്തലയും നടത്തിയ കൂടിക്കാഴ്ചയാണ് ഇപ്പോള് രാഷ്ട്രീയ വൃത്തങ്ങളില് പ്രധാന ചര്ച്ചയായി മാറിയിരിക്കുന്നത്.
മുഖ്യമന്ത്രി സ്ഥാനത്തേക്ക് വി ഡി സതീശനെ ഹൈക്കമാന്ഡ് തെരഞ്ഞെടുത്തതിന് പിന്നാലെ കോണ്ഗ്രസ് അകത്തെ ഗ്രൂപ്പ് രാഷ്ട്രീയത്തെക്കുറിച്ചുള്ള ചര്ച്ചകളും ശക്തമായിരുന്നു. അതിനിടെ ഇടഞ്ഞുനിന്നതായി റിപ്പോര്ട്ടുകള് വന്ന രമേശ് ചെന്നിത്തലയെ നേരിട്ട് വീട്ടിലെത്തി കാണുകയായിരുന്നു നിയുക്ത മുഖ്യമന്ത്രി വി ഡി സതീശന്.
കൂടിക്കാഴ്ചയ്ക്ക് ശേഷം മാധ്യമങ്ങളോട് പ്രതികരിച്ച സതീശന്, ചെന്നിത്തല തന്റെ നേതാവും ജ്യേഷ്ഠ സഹോദര തുല്യനുമാണെന്ന് പറഞ്ഞു. ഈ വീട് നിര്മിച്ച കാലം മുതല് താന് ഇവിടെ വരാറുണ്ടെന്നും, മാധ്യമങ്ങള് പ്രചരിപ്പിക്കുന്ന തരത്തിലുള്ള പ്രത്യേക രാഷ്ട്രീയ സന്ദേശങ്ങളൊന്നും ഈ സന്ദര്ശനത്തിന് പിന്നിലില്ലെന്നും അദ്ദേഹം വ്യക്തമാക്കി.
“പുതിയ ദൗത്യം ഏറ്റെടുക്കുമ്പോള് അദ്ദേഹത്തിന്റെ അനുഗ്രഹവും പിന്തുണയും ഉണ്ടാകുമെന്ന് ഉറപ്പുണ്ട്,” എന്നാണ് വി ഡി സതീശന് പറഞ്ഞത്. അതേസമയം, ചെന്നിത്തല മന്ത്രിസഭയില് ഉണ്ടാകുമോ എന്ന ചോദ്യത്തിന് പാര്ട്ടി നേതൃത്വം ചര്ച്ച ചെയ്ത് തീരുമാനമെടുക്കേണ്ട വിഷയമാണെന്നും, അദ്ദേഹവുമായി കൂടിയാലോചിച്ചായിരിക്കും അന്തിമ തീരുമാനം ഉണ്ടാകുകയെന്നും സതീശന് വ്യക്തമാക്കി.
വി ഡി സതീശന് മുഖ്യമന്ത്രിയായതില് സന്തോഷമുണ്ടെന്ന് പ്രതികരിച്ച രമേശ് ചെന്നിത്തല, ഹൈക്കമാന്ഡിന്റെ തീരുമാനത്തെ പൂര്ണമായും സ്വാഗതം ചെയ്യുന്നതായും പറഞ്ഞു. “വളരെ അടുത്ത വ്യക്തിപരമായ ബന്ധങ്ങളാണ് ഞങ്ങള്ക്കിടയില് ഉള്ളത്,” എന്നായിരുന്നു ചെന്നിത്തലയുടെ പ്രതികരണം.
കഴിഞ്ഞ പത്ത് വര്ഷമായി തുടരുന്ന എല്ഡിഎഫ് ഭരണത്തിന് വിരാമമിടാനുള്ള ഉത്തരവാദിത്വമാണ് പാര്ട്ടി വി ഡി സതീശനില് ഏല്പ്പിച്ചിരിക്കുന്നതെന്നും, ആ ദൗത്യം കോണ്ഗ്രസ് പ്രവര്ത്തകരും നേതാക്കളും ഒരുമിച്ച് നിന്ന് വിജയിപ്പിക്കുമെന്നും ചെന്നിത്തല പറഞ്ഞു.
മന്ത്രിസഭയില് ഉള്പ്പെടുമോ എന്ന ചോദ്യത്തിന് “അത് പാര്ട്ടിയാണ് തീരുമാനിക്കേണ്ടത്” എന്ന മറുപടിയാണ് ചെന്നിത്തല നല്കിയത്. “എന്തെങ്കിലും ഉപാധിയുണ്ടോ?” എന്ന മാധ്യമപ്രവര്ത്തകരുടെ ചോദ്യത്തിന് “ഞങ്ങള് തമ്മില് എന്ത് ഉപാധി?” എന്ന മറുചോദ്യവും അദ്ദേഹം ഉയര്ത്തി.
അതേസമയം, കോണ്ഗ്രസ് അകത്തെ ഐക്യം ഉറപ്പാക്കുന്നതിനും മുന്നണിയെ ഒറ്റക്കെട്ടായി മുന്നോട്ട് കൊണ്ടുപോകുന്നതിനും ചെന്നിത്തലയുടെ അനുഭവസമ്പത്ത് അനിവാര്യമാണെന്നാണ് രാഷ്ട്രീയ നിരീക്ഷകര് വിലയിരുത്തുന്നത്. ഹൈക്കമാന്ഡും ചെന്നിത്തലയെ മന്ത്രിസഭയില് ഉള്പ്പെടുത്തണമെന്ന് ആഗ്രഹിക്കുന്നുവെന്ന സൂചനകളാണ് പുറത്തുവരുന്നത്.
രാഹുല് ഗാന്ധിയുമായി നടത്തിയ ഫോണ് സംഭാഷണത്തിനിടയിലും മുഖ്യമന്ത്രി തെരഞ്ഞെടുപ്പില് ഉണ്ടായ അവഗണനയെക്കുറിച്ച് ചെന്നിത്തല അതൃപ്തി പ്രകടിപ്പിച്ചെന്ന റിപ്പോര്ട്ടുകള് നേരത്തെ പുറത്തുവന്നിരുന്നു. എന്നാല് ഇന്നത്തെ കൂടിക്കാഴ്ചയ്ക്ക് പിന്നാലെ കോണ്ഗ്രസ് അകത്തെ മഞ്ഞുരുകല് ആരംഭിച്ചോയെന്ന ചോദ്യമാണ് ഇപ്പോള് രാഷ്ട്രീയ കേരളം ചര്ച്ച ചെയ്യുന്നത്.
