കേരള രാഷ്ട്രീയത്തിൽ ദിവസങ്ങളായി നിറഞ്ഞുനിന്നിരുന്ന ചർച്ചകൾക്കും അഭ്യൂഹങ്ങൾക്കും ഒടുവിൽ അന്ത്യം. യുഡിഎഫിന്റെ വൻ വിജയത്തിന് പിന്നാലെ മുഖ്യമന്ത്രി സ്ഥാനത്തെ ചുറ്റിപ്പറ്റി നടന്ന നീണ്ട അനിശ്ചിതത്വങ്ങൾക്ക് വിരാമമിട്ട് വി.ഡി. സതീശനെ കേരളത്തിന്റെ പുതിയ മുഖ്യമന്ത്രിയായി ഹൈക്കമാൻഡ് ഔദ്യോഗികമായി പ്രഖ്യാപിച്ചു.
ഡൽഹിയിൽ എഐസിസി സംഘടിപ്പിച്ച പ്രത്യേക വാർത്താസമ്മേളനത്തിലായിരുന്നു പ്രഖ്യാപനം. കോൺഗ്രസ് ജനറൽ സെക്രട്ടറി മുകുൾ വാസ്നിക്, അജയ് മാക്കൻ, കേരളത്തിന്റെ ചുമതലയുള്ള എഐസിസി ജനറൽ സെക്രട്ടറി ദീപാദാസ് മുൻഷി എന്നിവർ സാന്നിധ്യത്തിലുണ്ടായിരുന്നു. തെരഞ്ഞെടുപ്പ് ഫലത്തിന് ശേഷം “ആരാണ് കേരളത്തിന്റെ അടുത്ത മുഖ്യമന്ത്രി?” എന്ന ചോദ്യമാണ് സംസ്ഥാന രാഷ്ട്രീയത്തിലെ പ്രധാന ചർച്ചയായി മാറിയത്. ഒടുവിൽ 11 ദിവസത്തെ നീണ്ട ചർച്ചകൾക്കും നേതൃത്വ തർക്കങ്ങൾക്കും ശേഷം ഹൈക്കമാൻഡ് വി.ഡി. സതീശന്റെ പേരിൽ അന്തിമ തീരുമാനമെടുക്കുകയായിരുന്നു.
മുഖ്യമന്ത്രി സ്ഥാനത്തേക്ക് കെ സി വേണുഗോപാൽ , രമേശ് ചെന്നിത്തല എന്നിവരുടെ പേരുകളും ശക്തമായി പരിഗണിക്കപ്പെട്ടിരുന്നുവെന്നാണ് രാഷ്ട്രീയ വൃത്തങ്ങൾ സൂചിപ്പിക്കുന്നത്. എന്നാൽ തെരഞ്ഞെടുപ്പിൽ യുഡിഎഫിന്റെ മുഖമായി മുന്നിൽ നിന്നതും എൽഡിഎഫ് സർക്കാരിനെതിരെ ശക്തമായ രാഷ്ട്രീയ പ്രചാരണം നയിച്ചതും സതീശന് അനുകൂലമായി.
പറവൂരിന്റെ മണ്ണിൽ നിന്ന് ഉയർന്നുവന്ന ഒരു സാധാരണ കെ.എസ്.യു പ്രവർത്തകനിൽ നിന്ന് കേരളത്തിന്റെ മുഖ്യമന്ത്രിപദവിയിലേക്ക് എത്തുന്ന സതീശന്റെ യാത്ര രാഷ്ട്രീയ കേരളത്തിന് ഏറെ ശ്രദ്ധേയമാണ്. വിദ്യാർത്ഥി രാഷ്ട്രീയത്തിലൂടെ പൊതുരംഗത്ത് എത്തിയ അദ്ദേഹം മഹാരാജാസ് കോളേജിലെ കാലം മുതൽ തന്നെ ശ്രദ്ധേയ വാഗ്മിയായിരുന്നു. പിന്നീട് നിയമപഠനം പൂർത്തിയാക്കി ഹൈക്കോടതിയിൽ അഭിഭാഷകനായി എൻറോൾ ചെയ്തെങ്കിലും രാഷ്ട്രീയമാണ് അദ്ദേഹത്തിന്റെ യഥാർത്ഥ പ്രവർത്തനമേഖലയായി മാറിയത്.
2001-ൽ ആദ്യമായി നിയമസഭയിലെത്തിയ ശേഷം പറവൂരിൽ നിന്ന് തുടർച്ചയായ വിജയങ്ങളിലൂടെ സ്വന്തം രാഷ്ട്രീയ അടിത്തറ ശക്തമാക്കിയ സതീശൻ, നിയമസഭയിലെ ശക്തമായ പ്രതിപക്ഷ ശബ്ദമായി മാറി. ഭരണപക്ഷത്തെ കൃത്യമായ കണക്കുകളും തെളിവുകളും നിരത്തി പ്രതിരോധത്തിലാക്കുന്ന അദ്ദേഹത്തിന്റെ പ്രസംഗങ്ങൾ ഏറെ ശ്രദ്ധ നേടിയിരുന്നു. “പഠിച്ചിട്ടേ സംസാരിക്കൂ” എന്ന വിലയിരുത്തൽ വരെ അദ്ദേഹത്തെ കുറിച്ച് രാഷ്ട്രീയ വൃത്തങ്ങളിൽ പ്രചരിച്ചിരുന്നു.
2021-ലെ നിയമസഭ തെരഞ്ഞെടുപ്പിന് ശേഷം പ്രതിപക്ഷ നേതൃസ്ഥാനം ഏറ്റെടുത്ത സതീശൻ കോൺഗ്രസിൽ തലമുറ മാറ്റത്തിന്റെ മുഖമായി മാറി. കെ.പി.സി.സി പ്രസിഡന്റ് കെ. സുധാകരനുമായി ഒപ്പമുള്ള രാഷ്ട്രീയ ഏകോപനം പാർട്ടിക്ക് പുതിയ ഊർജം നൽകിയെന്ന വിലയിരുത്തലും ശക്തമാണ്. ഡാറ്റ അടിസ്ഥാനമാക്കിയുള്ള രാഷ്ട്രീയ വിമർശനങ്ങളും അഴിമതിവിരുദ്ധ നിലപാടുകളും സതീശനെ യുവാക്കൾക്കിടയിലും ശ്രദ്ധേയനാക്കി.
സ്പ്രിങ്ക്ളർ വിവാദം മുതൽ ലൈഫ് മിഷൻ വരെ വിവിധ വിഷയങ്ങളിൽ സർക്കാരിനെതിരെ ശക്തമായ ആക്രമണം നടത്തിയ നേതാവെന്ന നിലയിലും അദ്ദേഹം ശ്രദ്ധിക്കപ്പെട്ടു. നിയമസഭയിൽ ഭരണപക്ഷത്തെ സമ്മർദ്ദത്തിലാക്കുന്ന ‘ഷാർപ്പ് ഷൂട്ടർ’ എന്ന വിശേഷണവും അദ്ദേഹത്തിന് ലഭിച്ചിരുന്നു.
മുഖ്യമന്ത്രി പ്രഖ്യാപനത്തിന് പിന്നാലെ സംസ്ഥാനത്തിന്റെ വിവിധ ഭാഗങ്ങളിൽ കോൺഗ്രസ് പ്രവർത്തകർ ആഘോഷം ആരംഭിച്ചു. തലസ്ഥാന നഗരിയിലടക്കം നിരവധി ഇടങ്ങളിൽ പ്രവർത്തകർ ആഹ്ലാദപ്രകടനവുമായി രംഗത്തെത്തി. അതേസമയം പുതിയ മന്ത്രിസഭാ രൂപീകരണ ചർച്ചകൾ ഉടൻ ആരംഭിക്കുമെന്നാണ് വിവരം. മുസ്ലിം ലീഗിന് നിർണായക വകുപ്പുകൾ ലഭിക്കാനിടയുണ്ടെന്ന സൂചനകളും പുറത്തുവരുന്നുണ്ട്.
കേരള രാഷ്ട്രീയത്തിൽ പുതിയ അധ്യായത്തിന് തുടക്കമാകുന്ന ഈ പ്രഖ്യാപനം സംസ്ഥാനത്തിന്റെ ഭാവി രാഷ്ട്രീയ ഗതിവിഗതികളെ എങ്ങനെ സ്വാധീനിക്കുമെന്നതാണ് ഇനി ഉയരുന്ന പ്രധാന ചോദ്യം. നിലപാടുകളിലും പ്രസംഗശൈലിയിലും വ്യത്യസ്തനായ വി.ഡി. സതീശൻ മുഖ്യമന്ത്രിയായി എത്തുമ്പോൾ കോൺഗ്രസ് പ്രവർത്തകരും യുഡിഎഫ് അനുഭാവികളും വലിയ പ്രതീക്ഷയോടെയാണ് കാത്തിരിക്കുന്നത്.
