തൃഷ കൃഷ്ണ എന്ന പേര് ഇന്നും തെന്നിന്ത്യൻ സിനിമയിൽ സ്റ്റൈലിന്റെയും സ്ഥിരതയുടെയും വിജയത്തിന്റെയും പ്രതീകമായി തുടരുകയാണ്. ഇരുപത് വർഷത്തിലേറെയായി നായിക സ്ഥാനത്ത് തിളങ്ങുന്ന തൃഷയെ കുറിച്ചുള്ള ചർച്ചകൾ വീണ്ടും സോഷ്യൽ മീഡിയയിൽ നിറയുകയാണ്. ഇത്തവണ താരത്തിന്റെ ആഡംബര ജീവിതവും മെയ് മാസത്തിൽ ലഭിച്ച തുടർച്ചയായ വിജയങ്ങളുമാണ് ശ്രദ്ധ നേടുന്നത്.
പുറത്ത് നിന്ന് നോക്കുമ്പോൾ ഗ്ലാമർ ലോകത്തിലെ വലിയ താരമെന്ന തോന്നൽ നൽകുന്ന തൃഷ, അടുത്തറിയുന്നവർക്ക് അതീവ ലളിതമായ വ്യക്തിത്വമാണ്. സിനിമാ തിരക്കുകൾക്കിടയിലും കുടുംബത്തിനും സമാധാനത്തിനും സ്വകാര്യ ജീവിതത്തിനും വലിയ പ്രാധാന്യം നൽകുന്ന ഒരാളായി തൃഷയെ സഹപ്രവർത്തകർ വിശേഷിപ്പിക്കാറുണ്ട്.
ഒരു സാധാരണ മധ്യവർഗ തമിഴ് ബ്രാഹ്മണ കുടുംബത്തിൽ നിന്നാണ് തൃഷയുടെ യാത്ര ആരംഭിക്കുന്നത്. സിനിമാ പശ്ചാത്തലമൊന്നുമില്ലാത്ത കുടുംബത്തിൽ നിന്ന് എത്തി സ്വന്തം കഴിവുകൊണ്ട് തെന്നിന്ത്യൻ സിനിമയിലെ മുൻനിര നായികയായി മാറുകയായിരുന്നു താരം.
റിപ്പോർട്ടുകൾ പ്രകാരം ഇന്ന് ഏകദേശം 85 കോടിയിലധികം രൂപയുടെ ആസ്തിയാണ് തൃഷയ്ക്ക് ഉള്ളത്. അതിൽ ഏറ്റവും കൂടുതൽ ശ്രദ്ധ നേടുന്നത് ചെന്നൈയിലെ ആഡംബര വസതിയാണ്. തേനാംപേട്ടിൽ സ്ഥിതി ചെയ്യുന്ന ഈ വീടിന് ഏകദേശം 10 കോടി രൂപ വിലവരുമെന്നാണ് റിപ്പോർട്ടുകൾ.
ഓറഞ്ച്, ബെയ്ജ്, ബ്രൗൺ, മ്യൂട്ടഡ് ഗോൾഡ് നിറങ്ങൾ ചേർന്ന ഇന്റീരിയറാണ് വീടിന്റെ പ്രധാന ആകർഷണം. ബ്രിക്ക് റെഡ് സോഫകളും മിനിമലിസ്റ്റിക് ഡിസൈനും അബ്സ്ട്രാക്റ്റ് ആർട്ട് വർക്കുകളും ചേർന്ന് വീടിന് പ്രത്യേക ഭംഗി നൽകുന്നു. സോഷ്യൽ മീഡിയയിൽ താരം പങ്കുവെക്കുന്ന ചിത്രങ്ങളിലൂടെ ആരാധകർ ഈ വീടിന്റെ മനോഹാരിത പലപ്പോഴും കാണാറുണ്ട്.
വീട്ടിലെ വാക്ക്-ഇൻ ക്ലോസറ്റും ബാക്ക്യാർഡും ആരാധകർക്ക് ഏറെ ഇഷ്ടപ്പെട്ട ഭാഗങ്ങളാണ്. അമ്മ, അമ്മൂമ്മ, പ്രിയപ്പെട്ട വളർത്തുനായ ഇസ്സി എന്നിവരോടൊപ്പം ഇവിടെ സമയം ചെലവഴിക്കുന്നതാണ് തൃഷയ്ക്ക് ഏറ്റവും പ്രിയപ്പെട്ട കാര്യമെന്നാണ് അടുത്തവൃത്തങ്ങൾ പറയുന്നത്.
അതേസമയം, മെയ് മാസം തൃഷയ്ക്ക് വ്യക്തിപരമായും കരിയറിലും വലിയ ആഘോഷങ്ങൾ സമ്മാനിച്ച മാസമായി മാറിയിരിക്കുകയാണ്. മെയ് 4ന് നടന്ന പിറന്നാൾ ആഘോഷങ്ങൾ സോഷ്യൽ മീഡിയയിൽ വലിയ ചർച്ചയായിരുന്നു. അതിനോടൊപ്പം വിജയിയുമായി ബന്ധപ്പെട്ട ഗോസിപ്പുകളും വീണ്ടും സജീവമായി.
വിജയിയുടെ തിരഞ്ഞെടുപ്പ് വിജയത്തിന് പിന്നാലെ തൃഷ അദ്ദേഹത്തെ സന്ദർശിച്ചതും പിന്നീട് സത്യപ്രതിജ്ഞ ചടങ്ങിൽ പങ്കെടുത്തതുമാണ് സോഷ്യൽ മീഡിയയിൽ വ്യാപകമായി ചർച്ചയായത്. നീല സാരിയിൽ എത്തിയ തൃഷ ചടങ്ങിന്റെ പ്രധാന ആകർഷണമായി മാറിയെന്ന വിലയിരുത്തലുകളും ഉയർന്നു.
ഇതിനിടെയാണ് കറുപ്പ് എന്ന പുതിയ ചിത്രത്തിന്റെ വിജയവും താരത്തിന് സന്തോഷം സമ്മാനിച്ചത്. സൂര്യ നായകനായ ചിത്രത്തിൽ തൃഷയാണ് നായികയായി എത്തിയത്. സിനിമയുടെ വിജയത്തിന് പിന്നാലെ “ഈ മെയ് മാസം എനിക്ക് മറ്റൊരു സൂപ്പർ വിജയം കൂടി നൽകി, എല്ലാം ദൈവത്തിന്റെ തീരുമാനം,” എന്ന കുറിപ്പോടെയായിരുന്നു തൃഷ സോഷ്യൽ മീഡിയയിൽ പോസ്റ്റ് പങ്കുവെച്ചത്.
ഈ പോസ്റ്റിന് പിന്നാലെ ആരാധകരും വിമർശകരും വിവിധ രീതിയിലുള്ള പ്രതികരണങ്ങളുമായി എത്തിയെങ്കിലും, തൃഷ തന്റെ വിജയ നിമിഷങ്ങൾ ആഘോഷിക്കുകയാണ് ഇപ്പോൾ.
