മലയാള സിനിമയിലെ പ്രേക്ഷക പ്രിയ താരങ്ങളായ മോഹൻലാൽ, പ്രണവ് മോഹൻലാൽ, എസ്തർ അനിൽ എന്നിവരെ ചുറ്റിപ്പറ്റിയൊരു രസകരമായ ഓർമ്മയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. ‘ദൃശ്യം 3’ റിലീസിനായി കാത്തിരിക്കുന്നതിനിടെ എസ്തർ അനിൽ നൽകിയ അഭിമുഖത്തിലെ ചില തുറന്നുപറച്ചിലുകളാണ് സിനിമാപ്രേമികൾക്കിടയിൽ ശ്രദ്ധ നേടുന്നത്.
തമിഴിൽ പുറത്തിറങ്ങിയ ‘പാപനാശം’ സിനിമയുടെ ചിത്രീകരണ സമയത്ത് ഉണ്ടായ അനുഭവങ്ങളാണ് എസ്തർ പങ്കുവെച്ചത്. ആ ചിത്രത്തിൽ സംവിധായകൻ ജീത്തു ജോസഫിന്റെ അസിസ്റ്റന്റ് ഡയറക്ടറായാണ് പ്രണവ് പ്രവർത്തിച്ചിരുന്നത്. എന്നാൽ മോഹൻലാലിന്റെ മകൻ സെറ്റിലുണ്ടെന്നറിഞ്ഞ തമിഴ് ക്രൂ അദ്ദേഹത്തെ കാണാൻ ആകാംക്ഷയോടെ തിരഞ്ഞെങ്കിലും ആദ്യ കാഴ്ചയിൽ ആരും വിശ്വസിച്ചില്ലെന്നാണ് എസ്തർ പറയുന്നത്.
“മുടി നീട്ടി, കീറിയ ഷർട്ട് ധരിച്ച് നിലത്തിരുന്ന ഒരാളെയാണ് അവർക്ക് കാണിച്ചുകൊടുത്തത്. അതാണ് മോഹൻലാലിന്റെ മകൻ എന്ന് പറഞ്ഞപ്പോൾ അവർക്ക് വിശ്വസിക്കാനായില്ല,” എന്നാണ് എസ്തർ ചിരിയോടെ ഓർമ്മിച്ചത്. പ്രണവ് ധരിച്ചിരുന്നത് പലപ്പോഴും മോഹൻലാൽ ഉപയോഗിച്ചിരുന്ന വലിയ ഷർട്ടുകളായിരുന്നുവെന്നും അതുകൊണ്ട് കൂടുതൽ കൗതുകകരമായിരുന്നുവെന്നും താരം പറഞ്ഞു.
തമിഴ് സിനിമാ സംഘത്തിലെ പലരും മോഹൻലാലിന്റെ മകനെ കുറിച്ച് മനസ്സിൽ സൃഷ്ടിച്ചിരുന്നത് പൂർണ്ണമായും വ്യത്യസ്തമായ ഒരു ഇമേജായിരുന്നു. എന്നാൽ അതിനൊട്ടും സാമ്യമില്ലാത്ത ലളിതമായ രൂപത്തിലാണ് പ്രണവ് സെറ്റിൽ ഉണ്ടായിരുന്നതെന്ന് എസ്തർ വ്യക്തമാക്കി. വിലകൂടിയ ജാഗ്വാർ കാർ വരെ സെറ്റിലുണ്ടായിരുന്നെങ്കിലും പ്രണവ് പലപ്പോഴും ട്രാവലറിനകത്തായിരുന്നു സമയം ചെലവഴിച്ചിരുന്നതെന്നും താരം കൂട്ടിച്ചേർത്തു.
അഭിമുഖത്തിലെ മറ്റൊരു രസകരമായ വെളിപ്പെടുത്തൽ പ്രണവിന്റെ പഴയ ഗേൾഫ്രണ്ടിന്റെ പേരിനെ കുറിച്ചായിരുന്നു. “അപ്പുവിന്റെ ഗേൾഫ്രണ്ടിന്റെ പേരും എസ്തർ ആയിരുന്നു” എന്ന് മോഹൻലാൽ തന്നോട് പറഞ്ഞിരുന്നുവെന്ന് എസ്തർ തുറന്ന് പറഞ്ഞു. ‘ഒരു നാൾ വരും’ എന്ന ചിത്രത്തിൽ മോഹൻലാലിന്റെ മകളായി അഭിനയിച്ച സമയത്തായിരുന്നു ആ സംഭാഷണം നടന്നതെന്നും താരം ഓർത്തെടുത്തു.
അന്ന് സിനിമയിൽ അഭിനയിക്കുന്ന പലർക്കും പേരുമാറ്റം സാധാരണമായിരുന്ന സമയമായിരുന്നു. തന്റെ പേര് മാറ്റണോ എന്ന ചർച്ചയ്ക്കിടെയാണ് മണിയൻപിള്ള രാജു മോഹൻലാലിനോട് അഭിപ്രായം ചോദിച്ചതെന്നും എസ്തർ പറയുന്നു. “എസ്തർ എന്ന പേര് കേട്ടപ്പോൾ ലാലേട്ടൻ പറഞ്ഞത്, അപ്പുവിന്റെ ഗേൾഫ്രണ്ടിന്റെ പേരും അതായിരുന്നു, നല്ല പേരല്ലേ, അത് തന്നെ വെച്ചോളൂ എന്നാണ്,” എസ്തർ പറഞ്ഞു.
പ്രണവുമായി അധികം സംസാരിച്ചിട്ടില്ലെങ്കിലും അദ്ദേഹത്തിന്റെ ലാളിത്യവും സ്വഭാവവും അന്നേ ശ്രദ്ധിച്ചതായി എസ്തർ പറയുന്നു. “അപ്പു വളരെ സിമ്പിളായിരുന്നു. സെറ്റിൽ ഒരാളായി മാത്രമേ പെരുമാറിയിരുന്നുള്ളൂ,” എന്നായിരുന്നു താരത്തിന്റെ വാക്കുകൾ.
‘ദൃശ്യം 3’ റിലീസിനായി കാത്തിരിക്കുന്ന ആരാധകർക്കിടയിൽ എസ്തറിന്റെ ഈ ഓർമ്മകൾ ഇപ്പോൾ വലിയ ചർച്ചയായി മാറിയിരിക്കുകയാണ്. ലളിതമായ ജീവിതശൈലിയിലൂടെ എന്നും ശ്രദ്ധിക്കപ്പെടുന്ന പ്രണവ് മോഹൻലാലിന്റെ വ്യക്തിത്വത്തെ കുറിച്ചുള്ള പുതിയ വശമാണ് ഈ അഭിമുഖം വീണ്ടും തുറന്നുകാട്ടുന്നത്.
